To av medlemmene til Bergen Ateliergruppe er med i organisasjonsteamet for festivalen: Marit Tunestveit Dyre som medlem av Performance Art Bergen og formidlingsansvarlig for arrangementet, og Sabine Popp som en av drivkreftene bak Longva kunstnarresidens og en av tilretteleggerne (sammen med Terese Longva og Rita Marhaug).
Mellom himmel & hav VII: Uvissas tilstand/ Between Sky & Sea VII: Flying Blind er eit arrangement der sju nasjonale og internasjonale kunstnarar, er invitert til å utvikle kunstverk i tida mellom 26.august og 8.september 2025 på Nordøyane nær Ålesund. Utfordringa gitt dei er å forme svar på affektive møte i natur- og kulturlandskapet med performance som uttrykk.
Uvissas tilstand/ Flying Blind utforskar om der er særlege deler av materien eller einskilde plassar som verkar inn på oss gjennom det vi sansar; og som vi kallar «privilegerte punkt». Om dette stemmer, kva for implikasjonar kan slike «privilegerte punkt» i landskapet ha for utviklinga av sosiale fellesskap? Kan vi sjå føre oss at slike kollektive opplevingar, i ein utforskande prosess med kunstnargruppa eller i lag med publikum, kan opne opp nye måtar å sjå samfunna våre på, frå det lokale til det planetariske?
Prosjektet samlar fleire perspektiv frå ulike fagfelt for å undersøkje tema for hendinga i år: Uvissas tilstand/ Flying Blind. Deltakargruppa tek del i turar i eit landskap prega av særeigen geologi og kulturelle spor av ulike tider, førelesningar og kritiske samtaler. I arbeidsperioden er kunstnarar, forskarar og lokale ekspertar saman. Dei inviterte førelesarane er: arkeolog Trond Lødøen (UiB), samfunnsvitar Harald Dyrkorn og kunstnar/forskar Michelle Teran. Kunstner/kurator/skribent Sissel Lillebostad er invitert som vitne og bidragsytar i samtalane.
Laurdag 6.september, frå kl.14, visar kunstnarane resultata i eit program for publikum. Dagen rundar av med fellesmiddag for kunstnarar og publikum på Longva kunstnarresidens.
Dei inviterte kunstnarane er: Signe Lidén (NO), Elin Sundström (SE), Bent Erik Myrvoll (NO), Marita Isobel Solberg (NO), Ian Nesbitt (UK), Anne-Marte Eidseth Rygh (NO) og Kamile Pikelyte (LT).
Mellom himmel & hav/ Between Sky & Sea er eit internasjonalt performance-initiativ som finn stad kvart tredje år på ulike norske øyer i regi av Performance Art Bergen. Festivalen feirar i år 20 år. Det er andre gong hendinga skjer på Skuløy/Flemsøy med Longva kunstnarresidens som samarbeidspartnar, produsent og arrangør.
Organisjonsteamet består av kunstnarane: Terese Longva, Rita Marhaug, Sabine Popp, Lillian Bjørdal, Malene Pedersen, Marit Tunestveit Dyre og Henrik Koppen. Dokumentasjon: Mateo Christensen og Nayara Leite
*Longva kunstnarresidens (Longva AIR) er ein internasjonal kunstarena under utvikling for profesjonelle kunstnarar, skribentar og andre med band til samtidskunstfeltet. Hovudmålet er å styrkje den profesjonelle infrastrukturen for kunst i regionen.
**Performance Art Bergen (PAB) er ein medlemsorganisasjon for kunstnarar som arbeider lokalt, nasjonalt og internasjonalt med mål om å styrkje og synliggjere performancekunst. Dette skjer gjennom å arrangere faglege fora, workshops, festivalar og kunstnarutvekslingar.
www.nordoyane.no
www.performanceartbergen.no
www.betweenskyandsea.com
